Kryetarja e Komisionit Evropian, Ursula fon der Lajen sot në Parlementin Evropian në Strazburg do të mbajë fjalimin e saj vjetor për “gjendjen e Unionit”.
Të premten, KE publikoi një përmbledhje të punës dhe arritjeve të Komisionit Evropian gjatë vitit të kaluar, i cili përshkruan aktivitetet e BE-së në përgjigje të agresionit rus kundër Ukrainës, përpjekjet për të reduktuar varësinë energjetike nga Rusia, arritjet në lidhje me prioritetet e tjera politike të Komisionit dhe përpjekjet për të forcuar prosperitetin dhe qëndrueshmërinë e Unionit nëpërmjet zbatimit të projekteve “GjenerataArdhshmeEU” dhe “RePauerEU”, si dhe zbatimit të Marrëveshjes së Gjelbër Evropiane dhe programit të Dekadës digjitale evropiane. Dokumenti përmban gjithashtu një përmbledhje të angazhimeve të BE-së me partnerët e saj në mbarë botën, veçanërisht ato të dedikuara për axhendën e tregtisë, si dhe iniciativat që synojnë forcimin e “shtyllave të demokracisë evropiane dhe ndërtimin e një Unioni të barazisë”.
Siç njoftoi raportuesi special i MIA-s nga Brukseli, në raportin për punën e KE-së rikujtohet se një vit më parë, BE-ja u përball me një nga sfidat më të mëdha të deritanishme – me një luftë që shpërtheu në kontinentin tonë dhe hera e parë që një vend fqinj ishte sulmuar për shkak të dëshirës së saj për t’u bashkuar me Unionin tonë.
“Rusia u përpoq të na shantazhonte me energji, ndërsa Evropa ishte në prag të krizës me lëndët djegëse fosile. Nuk e dinim nëse rezervat tona të gazit do të mjaftonin për dimër. Por ne e dinim thellë në zemrat tona se nuk mund të heqim dorë nga miqtë tanë ukrainas, të cilët po luftojnë për lirinë e tyre. Ne duhej t’i jepnim fund shpejt varësisë sonë nga lëndët djegëse fosile ruse, duke diversifikuar dhe përshpejtuar kalimin drejt energjisë së pastër. Dhe ne e bëmë atë, së bashku. Jo sepse ishte e lehtë, por sepse ishte gjëja e duhur”, thuhet në dokument.
Në përmbledhjen theksohet se përcaktime të tilla pasqyrojnë “shpirtin e Komisionit Evropian të kryetares Ursula fon der Lajen”.
“Që nga viti 2019, evropianët kanë duruar një pandemi globale, kanë përballuar një krizë energjetike dhe kanë mirëpritur në shtëpitë e tyre numrin më të madh të njerëzve të zhvendosur që nga Lufta e Dytë Botërore. Pavarësisht nga telashet e tilla, ne kurrë nuk jemi lëkundur në angazhimin tonë ndaj Marrëveshjes së Gjelbër Evropiane, inovacionit digjital drejtuar njeriut dhe drejtësisë sociale. Ky është një Komision që i qëndron besnik fjalës së tij dhe realizon”, theksohet në raportin.
Në dokument thuhet se Maqedonia e Veriut, së bashku me 27 vendet anëtare të BE-së, Islandën, Norvegjinë, Serbinë dhe Turqinë përmes Mekanizmit të Mbrojtjes Civile të BE-së, kanë marrë pjesë në ofrimin e mbi 94,000 tonëve ndihma për Ukrainën, vlera e të cilave vlerësohet në mbi 760 milionë. euro.
